沈晓榆：「武术无佢无我！」

发布日期: 2025-09-12

【武术之路．无惧挑战】

今届世运会勇夺女子长拳剑术枪术全能金牌，并担任开幕礼持旗手嘅香港武术运动员——沈晓榆一直以武术挑战自己极限，每一次跳跃、每一套动作都系青春嘅印记。对佢嚟讲，武术唔只系运动，更系生活嘅一部分：「武术对我嘅存在就系无佢无我，所有喜与悲都系佢带俾我。」正因为钟意挑战同动作型格，佢决定走上专业道路，睇吓自己可以去到几尽。

（图片来源：受访者提供）

沈晓榆话最令佢印象深刻嘅系近期2025年第12届世界运动会：「第一次喺咁多观众面前比赛，规模都好大，感受到满满支持，好佩服自己可以承受全能项目嘅心理压力，仲能享受成个比赛过程。」呢种经历令佢更加坚定自己对武术嘅热爱。

成为专业武术运动员唔易，最大挑战系点样避免伤患。「每日练嘅跳跃动作落地都可能整亲或者劳损，一整亲嘅话好多嘢都做唔到，所以一定要避免伤患。」而且要将动作演绎到极致，配合个人风格，同时做到收放自如，都系多年累积嘅功夫。沈晓榆坦言：「唔系对打运动，要靠自己联想动作嘅攻防意识，再用自己风格去演绎，真系唔容易。」

短期目标系今年世界锦标赛争取金牌，远少少就系2026年亚洲运动会全能项目奖牌。对佢嚟讲，亚运会奖牌系由细个已经梦想突破嘅目标。

（图片来源：受访者提供）

沈晓榆勉励年轻武术运动员：「唔好因为几次失误就放弃武术，你哋一定会喺过程中收获好多，变得更加强大！」

每一次武术挥动，背后都系汗水、毅力同青春嘅痕迹。

世运会

人物专访